اتوار 3 ذوالقعدہ 1442ﻫ - 13 جون 2021

بھارت کو ایک مضبوط فوج کے باوجود کشمیر میں شکست سے دوچار ہونا پڑے گا : سید علی گیلانی

مقبوضہ کشمیر میں کل جماعتی حریت کانفرنس کے چیئرمین سید علی گیلانی نے ایک بار پھر لوگوں سے اپیل کی ہے کہ وہ اپنی جائیدادیں غیر کشمیریوں کو فروخت نہ کرکے تجارت، تعلیم اور ترقی کے نام پر جموں و کشمیر کے مسلم اکثریتی تشخص کو تبدیل کرنے کے بھارتی عزائم کو ناکام بنائیں۔ کشمیر میڈیا سروس کے مطابق سید علی گیلانی نے عید الفطر کے سلسلے میں جموں وکشمیر کے عوام کے نام ایک پیغام میں ان پر زور دیا ہے کہ وہ غیر کشمیریوں کو کرایہ دار کے طور پر بھی قبول نہ کریں۔ انہوں نے لوگوں پر زور دیا کہ وہ جموں و کشمیر کے مسلم اکثریتی تشخص کے خلاف بھارتی عزائم کو ناکام بنانے کے لئے اپنے رشتہ داروں ، دوستوں اور ساتھیوں کو بھی قائل کریں کہ وہ تجارت ، تعلیم اور ترقی کے نام پر بھی اپنی جائیداد بیرونی لوگوں کو فروخت نہ کریں ۔ حریت چیئرمین نے بھارت کی طرف سے جموں و کشمیر میں مسلسل جابرانہ تبدیلیوں کا مقابلہ کرنے کے لیے ثابت قدمی اور اتحاد کی ضرورت پر زور دیا۔ انہوں نے کہا کہ بھارت کو شکست کا سامنا کرنا پڑے گا کیونکہ ظالم کا رسوا ہونا قانون قدرت ہے۔انہوں نے کہا کہ انفرادی اور اجتماعی طور پر بھی بھارتی منصوبوں کی مزاحمت کی ضرورت ہے اور غیر کشمیریوں کے ساتھ تعاون نہ کیا جائے چاہے وہ مزدور یا گزشتہ کئی سالوں سے علاقے میں رہائش پذیر طلباء ہی کیوں نہ ہوں کیونکہ وہ بھارت کے کٹھ پتلی ہیں۔ انہوں نے خبردار کیا کہ جو لوگ جموں و کشمیر میں بھارت کے مذموم ایجنڈے کو پورا کرنے کے لئے اس کے ساتھ تعاون کریں گے انہیں عوام کے غم و غصے کا سامنا کرنا پڑے گا۔سید علی گیلانی نے کہا کہ بھارت کشمیری شہداء کی میتوں سے بھی خوفزدہ ہے اور وہ تدفین اور آخری دیدار کے لیے بھی میتیں ان کے والدین کے حوالے کرنے سے انکار کررہا ہے۔ انہوں نے کہا کہ شہداء کشمیری عوام کے ہیرو ہیں اور جس مقام پر انہیں دفن کیا جاتا ہے وہ کشمیری عوام کے لئے ایک مقدس مقام ہے۔ انہوں نے کہاکہ کشمیری نوجوان شہداء کے مشن کو پورا کرنے کے لئے پرعزم ہیں، اس سے کوئی فرق نہیں پڑتا کہ بھارت ان کی میتوں کو سمندر میں پھینک دیتا ہے یا جنگلوں میں دفن کردیتا ہے کیونکہ وہ ہمیشہ جنت میں رہنے والے ہیں۔حریت چیئرمین نے اس عزم کا اعادہ کیا کہ بھارت کو جدید ترین اسلحے سے لیس ایک مضبوط فوج کے باوجود کشمیر میں شکست سے دوچار ہونا پڑے گا اور بالآخر فتح کشمیریوں کی ہوگی۔ انہوں نے دنیا بھر کے مسلم ممالک سے اپنی خاموشی توڑنے اور اسلام سے وفاداری ثابت کرنے کے لیے کہا کیوں کہ مسلم دنیا کے قلب میں ایک اور فلسطین بنایا جارہا ہے۔ انہوں نے خاص طور پر پاکستان کو ایک مسلم ریاست ہونے کے ناطے اپنا کردار ادا کرنے کی تاکید کی۔سید علی گیلانی نے بھارت کے مسلمانوں سے بھی ہمدردی کا اظہار کرتے ہوئے کہا کہ جس ملک کو وہ اپنا مادر وطن سمجھتے ہیں وہاں انہیں کوئی اہمیت نہیں دی جارہی ۔ انہوں نے کہاکہ یہ بات ثابت کرنے کے لئے کافی ہے کہ تحریک پاکستان جنونیت نہیں بلکہ جنوبی ایشیا میں اسلام اور مسلمانوں کے تحفظ کے لئے گہری سوچ کا نتیجہ تھی۔

یہ بھی دیکھیں

وزیراعظم عمران خان کا بے گھر افراد کو چھت کی فراہمی کا وعدہ پورا ہونے لگا۔ 

وزیراعظم عمران خان کا بے گھر افراد کو چھت کی فراہمی کا وعدہ پورا ہونے …

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے